Кара-Сууда борбордук «Манас» стадионун масштабдуу реконструкциялоо иштери башталды. 1960-жылы курулган объект толугу менен оңдолот. Иш райондун 90 жылдыгына карата жүргүзүлүүдө. Бул тууралуу шаар мэри Майрамбек Тентимишов билдирди.
Анын айтымында, стадион 5 миң көрүүчүгө ылайыкталган. Долбоор былтыр Кара-Сууга тик учак менен келип, жергиликтүү тургундардын кайрылуусунан кийин демилгени колго алган УКМКнын төрагасы Камчыбек Ташиевдин жеке көзөмөлүндө ишке ашырылууда.
«Жергиликтүү эл көптөн бери стадионду оңдоп-түзөөнү кыялданып, алтургай акча чогултуп да коюшкан. Бирок пикир келишпестиктерден улам демилге ишке ашкан жок. Азыр иш кызуу жүрүп жатат», — деди активисттердин бири.
Реконструкциялоо иштери мурда Жалал-Абаддагы «Барселона» футбол клубунун курулушуна катышкан адистер тарабынан жүргүзүлүүдө. Долбоор үстүн толук алмаштырууну, заманбап стенддерди орнотууну жана инфраструктураны иретке келтирүүнү камтыйт. Газондун сапатына өзгөчө көңүл бурулууда. Жасалма аянттын ордуна Өзбекстандан келген адистер өстүргөн табигый чөптү пайдалануу чечими кабыл алынган. Автоматтык сугат системасы буга чейин орнотулган.
